Mir sinn e glaini gmischti Pfyffer- und Dambuuregrubbe, wo jedes Joor an dr Fasnacht dr Cortège lauft, immer mit emene Sujet und dr Ladäärne. Uns isch es wichtig, dass mir's zämme guet und luschtig hänn, siggs an de Iebigsstunde, gmainsame Aläss und natürlig an de "drey scheenschte Dääg".

Uns isch wichtig, dass mir d'Fasnachtstradition us Basel dien pfläge. Bi uns gits kei Fasnacht uss dr Gugge, mir mache alles sälber, agfange vo der Sujetwahl über Goschdym naije, d'Larve kaschiere und moole, d'Perügge knüpfe und montiere. Nur d'Ladäärne wird durch unsere langjöörige Künstler gmoolt.

Mir träffe uns regelmässig in unserem Cliquekäller, am Zyschtig zu de Iebigsstunde vom Achti bis am Zähni zobe und jewyls am Frytig ab de Achte zumene gmietlige Hogg. Am letschte Frytig vom Monet gits immer öbbis zässe, wo vomene Mitglied kocht wird.

Mir freue uns über Verstergig im Vortrab, bi de Pfyffer und bi de Dambuure. Es spielt kai Rolle, ob du e Wyybli oder e Männli, jung oder alt bisch, hauptsach du hesch Freud, mit uffgstellte Lüt die "drey scheenste Dääg" z'verbringe.